ТҮРКІ ӘЛЕМІНІҢ ӘДЕБИ МҰРАСЫ: ТҮРКІ МӘДЕНИЕТІ ЖӘНЕ МҰРАСЫ ҚОРЫ XII БАКУ ХАЛЫҚАРАЛЫҚ КІТАП КӨРМЕСІНЕ ҚАТЫСУДА

2026 жылғы 21 қазанда Баку Экспо орталығында XII Баку халықаралық кітап көрмесінің ресми ашылу салтанаты өтті.

Іс-шара аясында Түркі мәдениеті және мұрасы қорының көрме павильонына Әзербайжан Республикасының Мәдениет министрі Адиль Каримли, мемлекеттік қызметкерлер, мемлекеттік мекемелердің өкілдері, сондай-ақ Әзербайжан Республикасында аккредиттелген дипломатиялық корпус өкілдері келді.

Мәртебелі қонақтар Қордың баспа қызметімен, түркі халықтарының бай тарихи, мәдени және әдеби мұрасын танытатын кітаптармен және көрме экспонаттарымен, сондай-ақ түркі әлемінің ортақ мәдени мұрасын сақтау, зерттеу және кеңінен насихаттауға бағытталған бастамаларымен танысты.

Айта кетейік, 21 қазанда XII Баку халықаралық кітап көрмесі аясында Түркі мәдениеті және мұрасы қоры Әзербайжан Республикасының Президенті Ильхам Әлиевтің «Хагани Ширванидің 900 жылдығын атап өту туралы» өкіміне сәйкес жарыққа шығарған «Хагани Ширвани – пьесалар жинағы», сондай-ақ белгілі қазақ жазушысы, публицист және мемлекет қайраткері Сауытбек Әбдірахмановтың Қор тарапынан әзербайжан тілінде басып шығарылған «Корифей» атты кітаптарының тұсаукесерлері өтті.

24 қазанда оқырман қауымға «Әзербайжан әдебиеттануындағы Низами Гәнджеви мен Әлішер Науаи шығармашылығы», «Юнус Эмренің өмірі мен таңдаулы өлеңдері» және «Олжас Сүлейменов Әзербайжан көзімен» атты кітаптар таныстырылады.

Ал 26 қазанда академик Низами Джафаров, профессор Махира Гусейнова және филология ғылымдарының докторы Айсель Гариблидің авторлығымен жарық көрген «Бірінші түркологиялық құрылтай», сондай-ақ профессор Низами Тагисойдың «Қазақ әдебиетінің тарихы» атты еңбектерінің тұсаукесерлері өтеді.